Plantun de Prouvènço

Pèr coumpara dos planto d'encò nostre

Astragalus onobrychis & Aegilops cylindrica

Astragalus onobrychis

Fabaceae Leguminosae

Noms en français : Astragale faux-sainfoin, Fausse Esparcette.

Descripcioun :
Lou faus-esparset fai parti dóu gènre Astragalus, mai douno un pau d'èr à-n-un esparcet. Es uno planto pelouso que rebalo un pau au sòu emé de cambo drecho que porton li flour, e mai longo que li fueio d'alentour. Li flour soun vióuleto e se destrìo subretout que sis estendard soun proun long e fan lou double di careno.

Usanço :
Avèn ges d'entresigne segur sus aquelo planto. Pamens fau saupre que d'ùni cese-fèr (gènre Astragalus e Oxytropis) soun empouisounant (dounon de proublèmo néuroulougi).

Port : Erbo
Taio : 10 à 50 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Astragalus
Famiho : Fabaceae
Famiho classico : Leguminosae

Ordre : Fabales

Coulour de la flour : Vióuleto
Petalo : irreguliero
Ø (o loungour) flour : 18 à 25 mm
Flourido : Printèms - Estiéu

Sòu : Ca
Autour basso e auto : 400 à 1800 m
Aparado : Noun
Jun à avoust

Liò : Tepiero - Lavandiero - Limas
Estànci : Subremediterran à Mountagnard
Couroulougi : Éurasiatico
Ref. sc. : Astragalus onobrychis L., 1753

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.